نقابة مهندسي مصر الجديدة !

2 07 2011

امبارح (الجمعة 1-7-2011) كان فيه جمعية عمومية غير عادية لنقابة المهندسين في الصالة المغطاه بالاستاد
المطالب الاربعة اللي كان عليها تصويت:-

1- الغاء الحراسة
2- تحديد ميعاد الترشح للانتخاب ( وكان المقترح انها تكون 15 – 7- 2011)
3- تحديد ميعاد الانتخاب( وكان المقترح انها تكون( 15 – 11- 2011) أو (يناير 2012))
4- كيفية الانتخاب ( ورقي ولا الكتروني)

ميعاد الجمعية كان الساعة 10 صباحا
والمفروض علشان نبدأ تصويت كان لازم يكتمل النصاب ( اللي هو 20% من مهندسين مصر !!) يعني حوالي 90000
ولو النصاب ماكتملش يبقى نستنى لحد الساعة 3 وساعتها ممكن نبدأ بالموجدين

الجميل في الموضوع اننا لما وصلنا الساعة 10 كان فيه ازدحام كبير وطوابير للدخول

وكان في نظام وتسجيل على الكمبيتور اسماء الحضور وكل مهندس/مهندسة بيستلم كتيب صغير بيشرح برنامج الجمعية العمومية الغير عادية وورقة كبيرة مكتوب في جهه منها نعم وفي الناحية التانية لا – علشان نستخدمها للتصويت
طبعا كان لازم يكون المهندس مجدد الاشتراك على الاقل 2010

وكان في مكان مخصص للصلاة الجمعة ( اه مكنش مكافي بس معقول إلى حد ما)
وأجمل حاجة انك تلاقي مهندسين من كل مصر — كان في ناس جاية من اسكندرية وناس جاية من بني سويف !!
غير انك تلاقي مهندسين دفعة السنة اللي فاتت ومهندسين كبار أوي في السن موجدين وبيشاركوا

وكان التصويت على المطالب حاجة راقية جدا وفعلا كل واحد كان حاسس ان صوته له قيمة
لدرجة إننا عدلنا ميعاد الانتخاب الموجود وخليناه في شهر سبتمير بدلا من نوفمبر أو يناير

اللي نفسي أقوله ياريت كل المهندسين تشارك بجد بفاعلية في أي حاجة تخص النقابة
والانتخابات خلاص جاية, فبجد عايزين مانضيعش حقنا بلسلبية وعدم الحضور
النقابة ممكن تفرق معانا جدا لو وضعها اتحسن وأدت دورها كما ينبغي

فياريت احنا كمهندسين نشجع بعض علشان نرجع حقوقنا اللي اتنهبت مننا من حوالي 17 سنة حراسة





اعلام هادف أم هادم؟

28 05 2011

المطالع للإعلام واعني هنا الجرائد خصوصا والبرامج الاخبارية عموما

يلاحظ التركيز على الاخبار التي تفرق لا تجمع

يركز على اخبار قد لا تكون ذات قيمة ولكن من باب جلب جمهور عريض !!

فتجد الاعلام يركز على الحالة النفسية للرئيس أو أنه بكى وقت التحقيق  ويضع هذا الخبر في صفحاته الاولى وبخط واضح

أو تجده يركز على النقاط التي تثير النزاع بين فئات الامة المختلفة ، كتركيزه في فترة من الفترات على تصيد مواقف المسلمين والمسيحيين
بشكل يشعل الفتنة لا يؤدها،
وتجده يتكلم عن الاحزاب بشكل يثير الفرقة والشتات
واستوقفني  خبر بالمصري اليوم “من «مليونية التحرير» لـ«الإخوان»: النصر بمن حضر “
لماذا هذه الروح ! نتحدث عن الحرية ثم نركز على فصيل له رأي مخالف بهذه الكيفية !!

بعد ثورة 25 يناير نتمنى من الاعلام عموما أن يكن ايجابي الوجهه ، يلم شمل الامة
الاعلام سلاح ذو حدين ، قد يساهم في بناء الامه ورفعة مجدها وقد يكون معول هدم لجدرانها





الأحداث سريعة – منذ ثورة 25 يناير

22 05 2011

سبحان الله مين كان يصدق كل اللي احنا فيه دولقتي من نعمة الحرية

ثورة مصر 25 يناير

والله لو كان حد يقول لنا في أول يناير اللي فات ، عنواين الاخبار من ساعة الثورة لحد دلوقتي مكنش حد يصدق

حبس مبارك 15 يوم على زمة التحقيق !!

التحقيق مع احمد عز وجرانة والعدلي وجمال وعلاء !!! وحبسهم بسجن طرة !!

الشعب يحاصر مقرات أمن الدولة ويقتحمها ويتحفظ على الملفات لحين وصول النيابة والجيش !!

والاحداث سريعة بشكل فظيع

والله من ايام الثورة وانا نفسي أدون واقول حاجات كتيرة ، لكن لسرعة الاحداث مش ملاحق

واتحولت للتدوين السريع عبر تويتر والفيس بوك

ولكن ما زال عندي الاشتياق للتدوين

 ، وكل مرة أقول هدون الاقي أحداث تحصل

دي أول تدوينة ليا بعد الثورة بــ أربع شهور !!  كان فيهم أحداث كتير مختلفة ومتنوعة بحلوها ومرها

لكن أهم حاجة نفسي أفكر نفسي ديما بيها وافكر كل اللي اعرفهم أو حتى اللي ما اعرفهمش

اننا لازم نستفيد بالفرصة  المتاحة لينا دلوقتي اننا نصلح في بلدنا

بجد الوقت بيجري بشكل سريع جدا والاحداث متتالية وسريعة

والواجبات أكثر من الأوقات

والفترة دي محتاج روح عالية و نفس طويل

واللي مش هيتحرك اليومين دول ويصلح في البلد هيتحرك امتى يا ترى ؟؟