جعلتني مدوناً – كلاكيت تاني مرة !

بسم الله الرحمن الرحيم

ممم

أخيرا هدّون ! أه هدون أصلي بصراحة كان نفسي من زمان أدّون لكن كل ما اقول هبدأ – ارجع تاني ( كأني بكلم واحد تاني ) المهم الحمد لله اه بدأت أول تدويناتي — بس مين بقى اللي جعلتني مدوناً دي ! ؟ هتعرفوا في نهاية كلامي

طيب انا بدون ليه ؟؟ دي حاجة مهمة – أصل ” إنما الأعمال بالنيات” فمهم الواحد يبقى عارف هو بيعمل اي حاجة في حياته ليه

1- بحب اتعرف على ناس كتير – وإن شاء الله التدوين هيسعدني على كده

2- بحب انقل خواطري وافكاري للأخرين – افيد واستفيد – افيد لأن اللي هيقرأ كلامي إن شاء الله هيأثر معاه ولو بلقليل وهستفيد لإني كلامي هيتم نقده من ناس ولأني لما أكتب اللي بفكر فيه هنظمه وهركزه

3- إن شاء الله ربنا يجعل المدونة دي في سجل حساناتي

4- علشان أشارك في عالم المدونين الجميل واللي بيأثر في شرية مش قليلة من الناس دلوقتي وده أصلا سبب تسميتي للتدوينة دي ” جعلتني مدوناً” فمدونة شبايك بصراحة هي كانت الدافع القوي اللي خلاني اخرج بالمدونة من حيز التفكير لحيز التنفيذ , فمشاء الله كم الاستفادة والتفاعل في المدونة دي غير عادي فربنا يجزي صاحبها خير الجزاء

أما بقى عن اسم المدونة شوية حاجات ! فانا شايف انه اسم معبر عن المدونة لأنها مش متخصصه في حاجة معينة يعني متفرقات بين خواطر و مشاعر وكتابات ومقالات ولأنها برضو شوية عربي عامي وشوية عربي خالي  آآقصدي بالفصحى يعني ومين عارف يمكن اكتب شوية إنجليزي ! المهم إنك إن شاء الله هلاقي فيها شوية حاجات تنفعك ولو منفعه بسيطة فادعوا الله لي بالتوفيق آه نسيت ليه كليكيت تاني مرة للي مايعرفش اني كنت بدأت أول تدويني ليا ولكن كان على موقع جوجل بس انا حبيت ادون على الموقع ده لأنه اشيك وأريح ادعولي بقى بلاستمرار علشان مادونش كام تدويني و بعد كده انام زي كام واحد من اصحابي