قال رسول الله صلى الله عليه وسلم (إذا مات الإنسان انقطع عنه عمله إلا من ثلاثة : إلا من صدقة جارية . أو علم ينتفع به . أو ولد صالح يدعو له )
صحيح مسلم 
كتير مننا يعرف الحديث ده كويس ويحفظه عن ظهر قلب ولكن مين فينا فكر جديا إن يبدأ في الاعمال اللي ثوبها يستمر حتى بعد ما نسيب الدنيا دي !!
في التدوينة دي هنتكلم عن العلم اللي أجره يستمر حتى بعد الموت !
أنا لما فكرت في الموضوع لقيت سبحان الله الموضوع سهل وبسيط جداااااا ومش محتاج غير تركيز بسيط مننا
وممكن نجمل الموضوع في نقطتين : (علم غيرك ولو قليل – انشر على النت ما تعرف !)
أولا : علم غيرك ولوقليل:
أي إنسان مهما كان كبير أو صغير ، متعلم أو حتى أميَ ، أكيد عنده معلومات أو خبرات ممكن يفيد بيها غيره ، وغيره ده يستفيد بيها ويفيد بيها آخر وهكذا فتلاقي المعلومة الصغيرة اللي انت عارفها ونفعت بيها غيرك أخدت بسببها – بإذن الله- ثواب كبير يمتد ويمتد حتى بعد وفاتك
ما تستهونش بأي كلمة أو نصيحة أو تجربة أو أي حاجة عارفها إنك تقولها لأي حد محتاجها
أفكار
- الاطفال الصغيرين : سواء قريبك أو غير قريبك – فكر كده ممكن تفيدهم بإيه وخلي ولو مرة كل شهر تعلمهم حاجة مفيده من اللي انت عارفها , ممكن تحفظهم سورة صغيرة , ممكن تعلمهم مهارة انت تجيدها , ممكن حاجات كتير بس انت ركز وفكر
- السابقين لك في الدراسة : ممكن تنقلهم خبرتك لما كنت ادهم وترشدهم وتحكيلهم ايه اللي حصل , أكيد هيستفيدوا من كلامك – حتى لو كنت انت مابتزاكرش لما كنت قدهم
مجرد نقلك لواقع ظروف السنة ده هيفيدهم ويديهم صورة هتنفعهم في سنتهم
- زملاء العمل : خصوصا لو حد جه الشغل جدبد فدي فرصتك انك تعلمه على قد ما تقدر ، فبعد كده لما هيطبقوا اللي اتعلموه منك او ممكن يعلموه للي بعدهم – كل ده هيكون في سجل حساناتك إن شاء الله
- أنشر خبراتك اللي حاسس انك اتعلمتها وبتفيدك في حياتك ، انشرها في كل اللي حولك واكيد هيستفادوا زيك
الفيصل في الموضوع ده إن أي حد بتعلمه أي حاجة تستحضر ديما النية دي
إن العلم ده إن شاء الله هتاخد ثوابه وهيستمر الثواب حتى بعد مماتك
نكمل إن شاء الله في الجزء التاني من التدوينة
