فيه حكمة انجليزية جميلة بتقول “ There is No accident ” يعني ما فيش صدفة !!
وسبحان الله كلام الحكمة دي ليه أصل في اسلامنا الحبيب ففي الحديث الطويل للرسول مع سيدنا جبريل “وتؤمن بالقدر خيره وشره ” وفي الحديث [ لا يؤمن عبد حتى يؤمن بالقدر خيره وشره ، حتى يعلم أن ما أصابه لم يكن ليخطئه ، وأن ما أخطأه لم يكن ليصيبه ] . ( صحيح )
حصل ليا اليومين اللي فاتوا دول موقفين جددوا جوايا الشعور بإن ما فيش صدفه
.jpg)
وافكترت بيهم من جديد كلمة لوحد صحبي كان بيقولتعليقا على كلمة ” الرجال مواقف “ إن الفكرة مش الموقف اللي تعدي عليك في الحياة مفيدة ولا لأ ؟ لكن الفكرة إن فعلا بتحاول تستفيد من المواقف دي ولا لأ ؟!
الموقف الأول : امرأة عجوز في الاوتوبيس
كنت رايح مشوار كده للقلعة وكنت راكب الاوتوبيس والاوتوبيس كان فاضي وركبت جنبي واحدة ست كبيرة شوية في السن ، المهم لقيتها بتفتح معايا كلام بداية بالساعة كام وبعد كده النهاردة ايه وهكذا 
وانا قعدت اتكلم معاها لأني حسيت انها محتاجة تتكلم مع حد ففرحت جدا اني بتكلم معاها وقعدت تحكيلي على ايام زمان لما كانت شاطرة في المدرسة وكانت بتحفظ قرآن وراحت قرأتلي سورة الانفطار علشان تثبتلي انها حافظة حاجات من القرآن وبرضو قلتلي نشيد كانت اخدته في المدرسة (كان نشيد ظريف بيتكلم عن الورد) وحكيتلي عن أولدها التلاتة وازاي هي بتحبهم وازاي هم بيبروها
وفضلت تتكلم معايا لحد ما وصلنا تقريبا وكنت بسمعها معظم الوقت أكتر ما إني بتكلم
الشاهد من الموقف ده إن اكيد الست دي مقعدش جنبي بالصدفة ! هو فعلا قدر
والموقف ده خلاني افكر واتخيل نفسي لما اوصل لسن كبير من العمر
ياترى هيكون ايه حالي ؟
هل هكون عملت حاجات مفيدة مؤثرة في الدنيا دي؟
ولا هقعد افتكر فتات الانجازات الشخصية !!
هل هكون وقتها مشغول بحاجات مفيدة بنيتها في شبابي؟
ولا هيخنقني الملل وهدور على اي حاجة اضيع فيها وقتي !!
الحاجة التانية اللي اتعلمتها ان الكبار من اللي حولينا فعلا محتاجين حد يتكلموا معاه ويفضفضوا
حتى لو كلامهم بالنسبة لنا حسينا فيه بملل لكن هم محتاجين حد يحسسهم بأهمية التجارب اللي مروا بيها وهي فعلا تجارب مهمة لو فكرنا فيها
هقول الموقف التاني في التدوينة الجاية إن شاء الله
