طبعا الايام اللي فاتت دي كان اكبر حاجة شاغلة الناس في مصروالجزائر هي حلم الوصول لكاس العالم
رغم ان فيه قضايا تانية مهمة على الساحة – لكن ربما لأنها قضايا كئيبة ونكدية فالناس عايزه تفرح بأي حاجة وخلاص
وعلى رأي الاعلانات _ حتى اللي مالهمش فيها بيشجعوا مصر !!
وأنا بصراحة كواحد من الشعب كنت بتمنى إننا نكسب ونوصل للكاس
أولاً لأني زي أي مصري نفسي بلدي تكسب
ولأني نفسي الشعب الحزين يفرح ولو علشان فريقه الكروي كسب – فعلا شعبنا ده غلبان أوي -
و علشان كان نفسي الفريق ده -اللي الكل بيشهد له بلعبه المتميز وأخلاقة العالية في مجمله لدرجة بيطلقوا عليه فريق الساجدين – كان نفسي الفريق ده يوصل للعالمية حتى لو مخدش الكاس ، خصوصا أبو تريكة اللي عمل بلعبة للكره رسالة دعوية اسلامية متميزة
طبعا سلبيات أخر ماتشين ( اقصد مردودها على المجتمع ) لا تخفى على أحد : كفاية روح العداوة اللي شفنها بين بلدين مسلمين
وكفاية الاشاعات اللي انتشرت عن الشعب المصري عن تعامله مع الجزائرين !!
وكفاية اللي حصل في المصريين الموجدين في الجزائر!
كنت قرأت مقولة يقال انها اتقالت في مسلسل أجنبي ” إن مباراة كرة قدم واحدة بين منتخبي بلدين، كفيلة بتدمير حصيلة 5 سنوات من الجهود الدبلوماسية للتقريب بين هذين البلدين“
أما الجانب الإيجابي في اللي حصل الاسبوع اللي فاتت :-
إننا شفنا المصرين متوحدين على موضوع واحد – فحتى العصبية البينيه بينا تلاشت في الوقت اللي كله بيشجع مصر
مافيش أهلاوي وزمالكاوي – مافيش مسلم ومسيحي ( وده تعصب مش موجود في مصر إلا بنسبة ضئيلة ) – مافيش واحد كروي والتاني ما بيشجعش – الكل كان بيشجع حتى الناس الكبار في السن والستات في البيوت الكل عنده أمل واحد
والأعلام المصرية كانت مالية الشوارع والعربيات و كاننا داخلين حرب نوفمبر المجيد !
نفسنا بقا نتوحد كمصريين في قضية مفيده لينا ولأمتنا
الحاجة التانية :- إن التعبئة الإعلامية قوة لا يستهان بها
فالتلفزيون والراديو والاعلانات في الشوارع والنت والناس وكله كان بيتكلم عن فريق مصر والأمل في الوصول لجنوب أفرقيا
وده كان أقوى اسبا
ب التوحد اللي قلته في النقطة الأولى ، فياسلام بقى لو إعلامنا ده يهدف ويوجه للي يفيدنا ويصلح من حالنا
الحاجة التالتة :- الفطرة الدينية ظهرت عندنا من جديد وكل الناس بتقول يارب ، والناس في الاستاد تدعي وتأمن ،
لكن يا خوفي بعد ما الموضوع هدي الفطرة دي تنام تاني !
أكيد في سلبيات وإيجابيات أكتر من كده
زي ما اكيد إننا نخسر في الماتش الفيصل ده هو الأفضل لينا
وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ
