مقبل على موضوع الجواز وفي حد معين ناوي تشوفه أو تتقدمله؟
تلاقي كتير يقولك: صلي صلاة استخاره
رايح تعمل مقابله في شركة معينة ، ومحتار هل هتكون افضل ليك من اللي انت فيها ولا لأ ؟
تلاقي كتير يقولك: صلي صلاة استخاره
ناوي على سفر لمكان معين بس محتار هل المكان ده أحسن ولا فيه مكان تاني احسن؟
صلي صلاة استخاره
والتدوينة دي مش علشان اتكلم عن صلاة الاستخاره وكيفيتها ودعائها
واللي يحب يعرف ممكن يشوف الرابط التالي
http://www.saaid.net/Doat/slman/149.htm
بس اللي حبب اتكلم عنه في التدوينة دي ان صلاة الاستخاره فعلا نعمة كبيرة من ربنا لينا لأن فعلا ممكن يكون حد فينا عنده موضوع محتار فيه وتسأل ناس كتير وتاخد رأيهم
لكن برضو في النهاية حيرتك تفضل موجوده !
و ممكن تكون مقدم على موضوع معين وواخد بكل الاسباب – لكن مش عارف هيتم ولا لأ – فلما تصلي استخاره هترتاح سواء جالك ولا لأ.
بجد في الصلاة دي رحمة كبيرة أوي
فسبحان الله لما تصلي استخاره فبتطمن أوي أنك استخرت ربنا اللي خالقك وعمره ما هيضيعك ولا هيقدَر ليك غير الخير ، فبالتالي بيطمئن قلبك أوي و بيبقى عندك يقين إن اللي حصل ده هو الخير ليك – حتى لو انت مش فاهم ازاي !!
وتسمع عن الصالحين السابقين فتلقيهم كانوا بيسخيروا تقريبا في كل حاجة في حياتهم حتى في ملح طعامهم !!!
بس فعلا من أهم الحاجات في الاستخاره ان اليقين ده يكون جواك لما بتدعي الدعاء
وإنك فعلا تقدم على الموضوع وتاخد بكل الاسباب وتسأل رأي الناس اللي رأيهم يفيدك في موضوعك ده .
وبعد كده ربنا هيقدر لك الخير ،
ففي الاستخاره رحمه وراحة نفسيه
Filed under: اسلاميات | Leave a Comment »
